BY :मच्छिन्द्र टिंगरे – झारगडवाडी ग्रामपंचायतीच्या माजी उपसरपंच सोनाली करे यांचें पती रामभाऊ करे यांनी दि. बारा जानेवारी रोजी गळफास लावून आत्महत्या केली होती. याबाबत आता सोनाली करे यांच्या तक्रारीवरून पंधरा सावकारांच्या विरुद्ध आत्महत्येस प्रवृत्त केल्याप्रकरणी बारामती तालुका पोलीस ठाण्यात गुन्हा दाखल केला आहे. गुन्हा दाखल होताचं परिसरात खळबळ उडाली असून बेकायदा सावकारांचा बंदोबस्त करण्याची मागणी केली जात आहे.
याबाबत सविस्तर माहिती अशी की, रविवार दि. बारा जानेवारी रोजी रामभाऊ सदाशिव करे यांनी शेतात गळफास लावून आत्महत्या केली. रामभाऊ करे हे बंद व्यावसायिक होते. पुणे सातारा जिल्ह्यात व्यवसायामुळे परिचित असणारे रामभाऊ करे यांच्या पत्नी सोनाली करे या 2023मध्ये गावाच्या उपसरपंच होत्या. गळफास घेतल्या नंतर सोनाली करे यांनी गावातील सावकार आणि पुढाऱ्यांनी रामभाऊ करे यांना कसा अन्याय अत्याचाराचा पाढा वाचला. लॉकडाऊन नंतर बंद पडलेला व्यवसाय उभा करण्यासाठी रामभाऊ यांनी गावातील काही सावकारांकडून व्याजाने पैसे घेतले होते. या सावकारांनी दुप्पट तिप्पट रक्कम परत करून ही रामभाऊ यांच्यामागे व्याजाच्या पैशाच्या वसुलीसाठी तगादा लावून मानसिक छळ केला होता. रामभाऊ करे हा मीतभाषी मृदू स्वभावाचा होता. अनेकांना पैसे परत करून ही हे सर्व सावकार व्याजाला सोकावले होते.
दरम्यान रामभाऊ करे यांना गावातील पुढाऱ्यांनी कचरे वस्तीवरील दत्त मंदिराच्या सांभामंडपाचे दहा लाख रुपयांचे कंत्राट सबठेकेदार म्हणून दिले होते. रामभाऊ यांना या कामाचे बील निघेपर्यत खर्चायला पैसे नव्हते तर याचं पुढाऱ्यांनी त्याला व्याजाने पैसे दिले. आणि कामाचे बील निघाल्यावर कामं मंजूर करून आणण्याचे कमिशन, बील काढण्याचे कमिशन, अशा प्रकारचे अनेक खर्च लावून त्याची आर्थिक फसवणूक केली. या शिवाय या पुढाऱ्यांनी दिलेल्या पैशाला भरमसाट व्याज लावले. आणि या पैशाच्या वसुलीसाठी रामभाऊ करे यांना जगणे मुश्किल केले होते. अशा आशयाची तक्रार सोनाली करे यांनी दिली आहे.
सोनाली करे यांच्या तक्रारीवरून 1)नारायण सोपानराव कोळेकर 2)पोपट शिवलाल निकम 3) तुकाराम बाबा थोरात 4)अंकुश बबन निकम 5)रशीद शेख 6)दशरथ टिकूळे 7)संतोष माने 8)कोळेकर पूर्ण नावं माहिती नाही. वं इतर सहा ते सात जण यांच्या विरुद्ध बारामती तालुका पोलीस ठाण्यात बेकायदा सावकारी, आत्महत्येस प्रवृत्त करणे, धमकी देणे, अशा कलमानुसार गुन्हा दाखल करण्यात आला आहे. या प्रकरणी आरोपीची तात्काळ धरपकड सुरु केली असून बेकायदा सावकरांचा बिमोड करणार असल्याचे तालुका पोलीस ठाण्याच्या पोलीस निरीक्षक पाटील यांनी ग्वाही दिली आहे. दरम्यान पोलिसांच्या कारवाई नंतर होलार समाजाच्या वतीने पुकारण्यात आलेले रास्तारोको चें आंदोलन स्थगित करण्यात आल्याची माहिती होलार समाजातील कार्यकर्त्यानी दिली आहे.
